نكت عشان الحبايب

واحد سوداني اتجوز واحدة سودانية خلفوا ولد أشقر و عينيه زرقا سموه رجل المستحيل

واحد سكران فتح التلاجة لقي الجيلي بيترعش .. قاله ماتخفش حاخد عصير

واحد صعيدي حب يعمل روش كتب على الشومة أديداس

واحد مسطول لجاي لابس جزمة سودة و جزمة بيضة ..
صاحبه بيقوله ايه ياعم الشياكة دي...
قاله ايه رأيك عندي جوز زي ده بالضبط في البيت

واحد صعيدي عاوز يقتل مراته حطيلها مسدس في الشوربة

واحد صعيدي ماشي في الشارع لقى قشرة موز ... قال ييييه حتزحلق تاني

واحد أحول جه يعيط رجع

واحد صعيدي مات جاله خمس ملايكة اتنين يحاسبوه و تلاتة يفهموه

واحد صعيدي بيدهن الحيطة .. قالوله حط جرنال تحتيك .. قالهم لأ أنا كده طايل كويس

واحد صعيدي مراته بتقوله قوللي حاجة حلوة
قاللها بسبوسة
قالتله لأ قوللي حاجة تهزني
قاللها مرجيحة
قالتله يا راجل قولي كلمة تحسسني ان انا مراتك
قالها انت طالق

واحد عنده كتكوت مفترس ، كل ما يدخله قفص الفراخ يروح الكتكوت واكلهم ، وفي قفص القرود ياكلهم ، وفي قفص القطط ياكلهم ، راح راميه في الصحرا . صعب عليه الكتكوت وراح يشوفه بعد تلات أيام ، لقى الكتكوت مرمي عالأرض والنسور بتحوم حواليه ، الراجل قاله : يا حبيبي إنت مت ؟ قام الكتكوت وقال له : يخرب بيتك بوظت الكمين
----------------------------------
اتنين مساطيل واحد سال التاني هو النهارده السبت و لا الحد قاله الاتنين قال ماشاء الله هما بقو سوا
---------------------------------
واحد دلوعة اوي ابوه جبله شريط اسلامي عشان ينصلح حاله تاني يوم الاب رجع البيت لقى ابنه متحجب
---------------------------------
واحده ست اشتركت فى من سيربح المليون جوزها طلقها عشان اتصلت بصديق
---------------------------------
واحد مسطول راح صيدلية يشترى جبنة حاول الصيدلى يفهمه ان مفيش جبنه بتتباع هنا وشويه و مسطول تاني جه، فالصيدلى قاله فهم صاحبك ان مفيش جبنه بتتباع هنا قال لة ياعم سيبك منة دا غبى ادينى بنص جنيه لانشون
---------------------------------
واحد قال نكتة قديمة طلع تراب من بقة
---------------------------------
عربجى كارو دخل فرح قال رفصنى ياجدع
---------------------------------
مرة واحد اتزنق في قرشين فعصوه
---------------------------------
اتنين مساطيل واقفين مستنيين الاوتوبيس فالاول بيسأل : هنعرف الاتوبيس ازاى التاني قاله بسيطه اللى هيجى يقف هنا يبقى اتوبيس قاله طب والكومسارى قاله: بسيطه اللي حيحط ايده على كتفك يبقى الكومسارى ندفعله الاجره فجه الاتوبيس ركبوا جه واحد حط ايده عليهم فطلعوله الاجره وبيدوهاله فقالهم : انا مش الكومسارى انا ضابط بحريه قاله شوفت شورتك المنيله ادينا ركبنا باخره